Drejtoresha e çerdhes në Pejë, ku u keqtrajtua njëvjeçarja: Mos e bëni tragjike! (Video)

Janë institucionet edukative që prindërit ua besojnë fëmijët e tyre, por jo gjithmonë kopshtet për fëmijë janë të afta për ta realizuar këtë mirëbesim.

Këtë e dëshmon edhe fotoja e vajzës së vogël, e cila ka qarkulluar gjithë ditës në rrjetet sociale.

Eda Jahaj nga Peja, në ditën e parë të saj në kopshtin e fëmijëve “Pëllumbat e Paqes”, kishte marrë lëndime serioze në tërë trupin.

Nëna e vajzës, Elvira Jahaj, thotë se është tmerruar kur e ka marrë vajzën e saj nga kopshti me shenja të kafshimit në tërë trupin.

Për RTV Dukagjinin ajo ka treguar se ka dyshime për rastin e ndodhur dhe se kërkon sqarime nga udhëheqësit e këtij institucioni.

Elvira ka thënë po ashtu se edhe pediatri e ka konstatuar që fëmija ka lëndime trupore, porse ajo çka po e brengos është se nga përgjegjësit nuk ka marrë asnjë përgjigje rreth rastit.

Drejtoresha e çerdhes, Resmije Bujupi, ka pranuar që lëndimi i fëmijës ka ndodhur në kopshtin që ajo e drejton, por tha se rastet e tilla “nuk duhet të bëhen shumë tragjike”.

Pavarësisht se Eda e vogël në ditën e saj të parë në kopsht duhej të kishte kujdesin maksimal, ajo vetëm pas dy orëve qëndrim kishte kërkuar ndihmën mjekësore. /RTV Dukagjini/Telegrafi/