E bujshme/ “Nëse Partizani e eliminon, Astana shkarkon trajnerin”! Kampionët e Shqipërisë kanë avantazh të madh, fati i ndjek edhe në Conference League

Partizani mund të quhet me fat në këtë rrugëtim në Europë. Të kuqtë kishin përballë në turin e parë Bate Borisov. Më mirë se kaq nuk mund të kishte dhe nëse do ta kishin zgjedhur me dorë kundërshtarin për disa arsye.

Fillimisht për shkak të formës së dobët të Bates që u tregua edhe në ndeshjet pasardhëse, ku pësuan pafundësisht gola. Më pas për shkak të pikëve të larta që kishin bjellorusët nga e kaluara në Europë dhe për këtë arsye, Partizani kalonte si favorit karshi rivalëve të tjerë në turet e tjera pasi vinte si humbësi ose fituesi i çiftit ku gjendej edhe Bate Borisov.

Ndërsa arsyeja e tretë ishte fakti se Partizani nuk do të luante në transfertë në asnjë rast, teksa UEFA dënoi ekipet bjelloruse që të mos luanin në shtëpi. Dy turet e tjera ishin shumë të lehta për Partizanin që ka provën e fundit dhe të së vërtetës me Astanën.

Në këtë rast kampionët e Shqipërisë mund të kishin më shumë fat, por Astana nuk është e pakalueshme. Për më tepër presioni është i gjithi te ekipi i Kazakistanit. Sipas asaj që raportohet nga mediat kazake, presidenca i ka bërë të qartë trajnerit të Astanës, Grigoriy Babayan se nëse do të eliminohet nga Partizani, do të shkarkohet nga detyra.

Kjo i rrit më shumë presionin Astanës që nuk po kalon një formë të mirë. Në shtatë ndeshjet e fundit, kjo skuadër ka fituar vetëm një ndeshje, ka barazuar dy ndeshje dhe ka humbur katër të tjerat. /Sport Ekspres/