Kadaj-Bujupi: Të lirohen Albini dhe Albulena

Deputetja e Aleancës për Ardhmërinë e Kosovës, Donika Kadaj-Bujupi, të cilët i është caktuar masa e arrestit shtëpiak, ka thënë se kështu duhet të veprohet edhe ndaj deputetëve të tjerë të opozitës, Albin Kurtit dhe Albulena Haxhiut.

Ajo në një status në “Facebook” ka thënë se kufijtë e Kosovës do të mbetën të paprekshëm.

“Kërkoj dhe uroj që sërish të jenë, sa më shpejtë, në mesin tonë edhe Albini e Albulena. Punë e madhe na pret përpara… “Zajednica” kurrë nuk do të kalojë. Kufijtë e Kosovës do të mbeten të paprekshëm. Burgjet, presioni e përndjekja s’do t’i ndalin përpjekjet tona. Deri në fund. Kurrë asgjë s’i ka ndalë përpjekjet dhe të drejtën e këtij populli, që nga mosnënshtrimi deri në kryengritje”, ka shkruar ajo.

Postimi i plotë:

Pas disa ditësh burgosjeje, jam sërish në

mesin e familjes. Tash, në arrest shtëpiak.

Por, kjo nuk është e tëra. Nuk është liria as satisfaksioni.Qëllimi ynë është më i madh dhe më fisnik. Është liria, shtetësia, shteti funksional dhe i tërë.

Unë, ashtu si dhe të gjithë kolegët e mi opozitarë, do të veproja njëjtë, në mbrojtje të shtetit dhe të kufijve tanë!

Ne s’do të ndalemi.

Ju falënderoj të gjithëve për mbështetjen, qyetarë të Kosovës, kolegë nga Aleanca, miqë dhe kolegë opozitarë, që u solidarizuat me mua, në forma të ndryshme.

Mbi të gjitha, ajo që na mbanë të fuqishëm e të pa lëkundur, përballë krejt këtyre “stuhive”, është sakrifica e të rënëve, që janë në themel të shtetit e lirisë sonë, sakrifica e atyre që bënë vite e dekada burg për lirinë dhe shtetin…

Ne do të ecim rrugës dhe porosisë së tyre.

Fatkeqësisht, edhe sot kemi të burgosur politikë, për po të njëjtat ideale, për Kosovën dhe shtetin.

Kërkoj dhe uroj që sërish të jenë, sa më shpejtë, në mesin tonë edhe Albini e Albulena.

Punë e madhe na pret përpara…

“Zajednica” kurrë nuk do të kalojë. Kufijtë e Kosovës do të mbeten të paprekshëm.

Burgjet, presioni e përndjekja s’do t’i ndalin përpjekjet tona. Deri në fund.

Kurrë asgjë s’i ka ndalë përpjekjet dhe të drejtën e këtij populli, që nga mosnënshtrimi deri në kryengritje.

‪#‎DK