Profesori, njëherësh anëtari i Kryesisë së LDK-së, Valon Murtezaj, ka thënë se proceset e anëtarësimit në organizata ndërkombëtare janë shumë komplekse dhe unike për secilën organizatë.
Murtezaj përmes një statusi në rrjetin social në Facebook ka shkruar se një format i njëjtë nuk zbatohet në të gjitha aplikimet.
Ai po ashtu tha se aplikimi nuk do të thotë anëtarësim.
“Kur flasim për diplomacinë multilaterale duhet të jemi të ndërgjegjshëm se është një formë delikate e politikës së jashtme dhe të bërit diplomaci. Aty kërkohen teknika tjera, krijime aleancash, debate dhe komunikim i përditshëm. Diplomacia në përgjithësi është politikë e jashtme, qeverisje, por është edhe sjellje diplomatike shumë delikate. Aplikimi nuk do të thotë anëtarësim. Pra, nuk duhet të ketë ekzaltime të parakohshme. Nuk mund të avancohet nëse një proces aplikimi për anëtarësim konsiderohet si një punë e thjeshtë rutinore, apo thjeshtë e drejtë për të aplikuar”, ka thënë Murtezaj.
Ai tutje shtoi se për të dal me sukses në këto situata duhet shumë komunikim mes palëve.
“Dhe kryesorja, për të dalur me sukses duhet shumë komunikim, me të vërtetë shumë komunikim, shumë respekt për palët, shumë të kuptuar të palëve, jo-arrogancë, duhet krijim dhe kultivim i marrëdhënieve me anëtarët e organizatës nga të cilët pret përkrahje dhe votë pozitive. Pastaj duhet alokuar burimet e nevojshme njerëzore që duhet të jenë profesionale dhe diplomatike të duhura. Diplomacia e Kosovës duhet t’i ketë këto parasysh”, ka shkruar ndër të tjera profesori Murtezaj.
