Veseli pret në takim kryetarin e Komunës së Ulqinit

Kryetari i Kuvendit të Republikës së Kosovës, Kadri Veseli, priti sot në takim kryetarin e Komunës së Ulqinit, Nazif Cungu, me të cilin bisedoi për situatën aktuale në vendin tonë dhe zhvillimet që përcollën skenën politike të Ulqinit në muajt e fundit. 

Duke i uruar mirëseardhje në Kosovë dhe në Kuvendin e saj, kryeparlamentari Veseli e uroi z. Cungu për detyrën e re në krye të Komunës së Ulqinit dhe i dëshiroi suksese në punën e tij të mëtutjeshme.

Kreu i Kuvendit të Kosovës dhe ai i Komunës së Ulqinit biseduan për lidhjet e fuqishme dhe të hershme që ekzistojnë midis Kosovës dhe qytetit të Ulqinit, përkatësisht qytetarëve respektivë, duke shtruar nevojën që këto raporte të forcohen edhe më tej.

Kryeparlamentari Veseli theksoi se bregdeti i Ulqinit vazhdon të mbetet një nga preferencat kryesore të turistëve nga Kosova, që lidhet edhe me pritjen bujare të ulqinakëve.

Në takim u bisedua edhe për të drejtat e shqiptarëve në shtetin malazez, duke e konsideruar këtë komunitet si një urë të rëndësishme bashkëpunimi midis dy shteteve.

Z. Veseli dhe z. Cungu potencuan aspiratat e përbashkëta të Kosovës dhe Malit të Zi për vazhdimin e rrugës së integrimeve euro-atlantike./Gazetaliria.com

2016_04_21_Kryetari Veseli takoi kryetarin e Komunes se Ulqinit, Nazif Cungu 2 2016_04_21_Kryetari Veseli takoi kryetarin e Komunes se Ulqinit, Nazif Cungu 3