Vulin e quan hero të dënuarin e Hagës për krime lufte në Kosovë

Ministri i Punës në Qeverinë e Serbisë, Aleksandar Vulin, ka thënë se Serbia nuk ua kthen shpinën gjeneralëve dhe heronjve të vetë, përkundrazi vendi mburret me ta.

Vulin, i cili dje në aeroportin e Nishit e priti të dënuarin e Hagës, gjeneralin Vladimir Lazareviq, tha sot se ai është krenar se Lazareviq më në fund është i lirë, ngase ai luftoi me heroizëm për vendin e tij,.

“Ai u mirëprit nga shteti siç duhej të bëhej, Serbia nuk është më një vend që heq dorë nga heronjtë e saj, ky është një vend që krenohet me gjeneralët e tij”, transmeton KP deklaratën e Vulinit për Televizionin “Pink”.

Ish-oficeri i Ushtrisë Jugosllave Vladimir Lazareviq, i cili u lirua pasi kreu dënimin e tij për krime lufte në Kosovë, u prit si hero pasi u shoqërua në shtëpi nga dy ministra të lartë të shtetit serb.

Me qindra njerëz që mbanin banderola me si “Mirësevjen, gjeneral!” dhe brohorisnin “Lazareviq, heroi ynë!”, përshëndetën ish-oficerin ushtarak pasi ai mbërriti në qytetin serb të Nishit nga qendra e paraburgimit në Hagë ditën e enjte.

Lazareviqi është dënuar për përgjegjësi komanduese me 14 vjet burg për krimet në Kosovë, si komandant i korpusit të Prishtinës, e pastaj edhe komandant i armatës së tretë të ushtrisë jugosllave më 1998 dhe 1999.

Ai ka vuajtur dy të tretat e dënimit, ndërsa në Hagë, siç shkruan Tanjug, është dorëzuar vullnetarisht në vitin 2005. Fillimisht është dënuar me 15 vjet, ndërsa pas ankesës dënimi i është zvogëluar për një vit. /KosovaPress/